Муносиби Муҳаммадато

Дис башанд гарминдэ борӯн бедарак,

Бе амал машард фармӯн бедарак.

Го зимистӯнанд-та чилла йоδд шито,

Бе сафедэ(я)ϑ йа зимистӯн бедарак.

Ай му Маẁло дак Ту аймӯнат адаб,

Бе Ту амраϑ нимча аймӯн бедарак.

∆аδэ аймӯнат адаб талим фукард,

Бе хирад мардард охӯн бедарак .

Нур муáбат беδҷ, ишқанд нист ниӿӯн,

Бе муáбат ишқэ ҷӯнӯн бедарак.

Вид ӿитэрцат мойэ осмӯн гар навид,

Ӿабэ чорда ӿо ку осмӯн бедарак.

Лӯдэ Маẁло лакэ «афйунат-шароб»,

Бе амал вистоẁ паймӯн бедарак.

Ẁуз йақин фамум ху лӯмвӯм, фам ẁэ Нỳр,

Ẁэ(я)т дэ фамт ҷисмандэ шайтӯн бедарак.

Тут дэ ас Маẁло сухан гарδент ху пиц,

Турд тилоẁат ẁам ẁэ Қурӯн бедарак.

Мунд саẁол халқард дивест чистӯн ҷиоẁ,

Бе ҷиẁоб ӿо йа му чистӯн бедарак .

Шойирен йастет Бадахӿӯнанд йэ кӯн,

Бе тама(я)ϑ нуқрат марҷӯн бедарак.

Баста ẁаз лап аммо мурд дис дивест,

Бе Ту Ẁарқа ҷамъэ йорӯн бедарак.

Лаълҷуба, Тусйӯн му ҷӯн дастур аммо,

Бе Ту зур чидоẁ пэ Тусйӯн бедарак,

Шанбэзода соз фукаϑ ҷӯнанд қуẃат,

Бе қуẃат дис ҷисмэ бе ҷӯн бедарак.

О Лидуш зиндат ца вуд лӯдэн ту маст,

Нур Ту ҷат ситоẁ ӿемӯн бедарак.

Аз ту шэр Раъно ẁизентум ẁуз Ẁатан,

Бе Ту шэрен Тоҷикистӯн бедарак.

Маш Бадахӿӯно му Маẁло δустэ гир,

Бе му Маẁло маш Бадахӿӯн бедарак.

О Муносиб, сар ца чудат соз нивишт,

Бе Ту соз оẁозэ хушхӯн бедарак.

                              10.10. 2012 Душанбе


Маш ху дил ас дин хабар бойад кинам,

Тар ху кирдорен назар бойад кинам.

Маш Ẁатанҷат δуст сипар бойад кинам,

Хокэ Куйистӯнэ зар бойад кинам,

Фук набарданд маш зафар бойад кинам,

Маш ху Куйистӯн дигар бойад кинам!

Маш Бадахӿӯн сар базебат сар баланд,

Ас ẁэ пирен вет ку зэзам фук ẁэ панд.

Ẁинд ẁэ чаӿмайат ẁэ савца дилписанд,

Фук мэ динйотир ẁэ мардум арҷманд,

Маш ẁэ жирен мис гуар бойад кинам,

Маш ху Куйистӯн дигар бойад кинам!

Вет ҷуӯн гулзортэ борӯн маш вийам,

Фук барост номусэ Хуґнӯн маш вийам.

Ат хубаϑ йакҷоϑ ас ҷӯн маш вийам,

Лак фук ошиқ дилтэ армӯн маш вийам.

Бар фалак ас сит-тэ сар бойад кинам,

Маш ху Куйистӯн дигар бойад кинам!

Дуса нист машард ғамат парẁо йичай,

Ғайрэ Маẁло нист ачаϑ амро йичай.

Маш ҷиноẁ хушбахт нист асло йичай,

Кандэ маш дастур ẁизент Маẁло йичай.

Пас Муносиб гап шакар бойад кинам,

Бад ху Куйистӯн дигар бойад кинам.

  29. 02.2016


Бе амрэ ху Маẁло ку лу кадецга раẁӯнат,

Шайтӯнэ лайинард ку цаẁахтецга чизӯнат.

Лакин ди бадэт, хубитэ мис дуса ху шаст кэ,

То кай ку ди ҷефатэ аррӯмаϑ ту ниӿӯнат.

Йиẁ пул қатэ суδҷ шойэ ҷуӯнат йига гумро,

Йиẁанд йу ачаϑ нист, йига безорэ ҷуӯнат.

Хушбахтэ ẁинен пул қатэ, бадбахтэ мис ас ẁэ,

Йиẁ ҷӯн диқатир зэздтайат, йиẁ δидта ху ҷӯнат.

Кадандта гулат хор пэ ам сен йэ баробар,

Афсус гулистӯнта ẁинум хор ẁэ мийӯнат.

Лӯдум ту на шойир а Муносиб на суханẁар,

Аммо ца чисум шойири дил дисга гумӯнат.

03.03.2016


Фукаϑ коранд а зирйот, ту ас ху тат дуо зэ,

Замат ẁинат хой руот, ту ас ху тат дуо зэ.

Натиҷа ас зиндагэ, δис сола мактабо нист,

Динйо ца вид мис қабот, ту ас ху тат дуо зэ.

Макэ ачаϑ эй вирод, ту тар мэ ҷефа аẁас,

Динйо ца киӿт мис ту мот, ту ас ху тат дуо зэ.

Шойат гадота хумне, йиẁаϑ кафан қатир тизд,

Нафамт йичай азобот, ту ас ху тат дуо зэ.

Ẁэ гап ниғӯґ кэ иҷро, йичайа ҷоẁидӯн нист,

Йирузта киӿт ху турд от, ту ас ху тат дуо зэ.

Даст ба дуо Муносиб, кэ зорэйат таẁалло,

Қабул сӯд ту муноҷот, ту ас ху тат дуо зэ.

   25.03. 2016

 


МАШ ҒАРИБЕНАРД

Ай му Маẁло! Ту ғарибентэ ху δуст сойа кэ,

Ай му Маẁло! Ту дэ ẁэ қинигийард чора кэ.

Ас ху маҷбурэ фукен ғер дийорандэ ғариб,

Ай му Маẁло! Фука ẁэ амдигар амсойа кэ.

Ẁа йэ лаза наẁизенен, на хурдат на ху хоб,

Ай му Маẁло! Ту сиат ẁэ фука ар бора кэ.

Ас йэ чиданд ғарибо чисэ фук чид ба ҷамат,

Ай му Маẁло! Ху дуо тар пуцата хола кэ.

На йичай уӿата лӯвдат, на йичай кал анҷивд,

Ай му Маẁло! Ту ба чора фука бечора кэ.

Пэ ту даргойэ Муносиб мэ муноҷот ца чуд,

Ай му Маẁло! Ту иҷобат кэху анзора кэ.

24. 04. 2016


Ас оламэ фӯнэ маш фукаϑ, даргузарам,

Беӿайэ қийӯматва фукаϑ, амсафарам.

Нур ғал йэ нафас ҷӯн бадандир, асир ца,

Ӿумне чисэ, сит биртэ фукаϑ бар-ба-барам.

Сурат қатэ одамам, хафа маса амо,

Сират қатэ йакҷо фукаϑик гоẁу харам.

Цем ẁинт ху ғэв лӯвд, амо дил тархуδм,

Дӯнҷат ба гумӯн руйэ ҷуӯн дарбадарам.

Ӿойамху гийо фукаϑ мэ динйо фамам,

Аммо фука ас рузэ ҷаззо бехабарам.

Озор Муносиб пи йичэϑ макэ йэ умр,

Йакҷота ху Маẁло қатэ ӿӯмен саҳарам.

 30. 04. 2016


Зар ачаϑ машанд навид мис, маш Бадахӿӯн сит нигин,

Ас фукаϑ динйотэ хушру, Ку ниӿин наник ризин,

Э қабул турд сам му Помир, тут Бийиӿт ғайр ас ту нист,

Шо Бурӯн чаӿма ту “Зам-Зам”, Шойэ Носир ангубин.

Йам ҷуӯн йакҷо асал сӯд, ат ẁэ маза мис чисум,

Э йу зẚр мурд сӯд лакин, гар ринэсум боб замин.

Лӯдэ Маẁло ас му Помир, тар ту шӯнт дойим Хуδой,

Дӯндавен ӿо мам ҷуӯнанд, нур йу суδҷ хушруйтарин.

Йам ҷуӯн рангината, арҷо дийат Помэр ниӿӯн,

Кайэ Мисрат, кайэ Индат, кайэ Ӿӯмат, кайэ Чин.

Э Муносиб ас ху созен, маст кэ нур хуґнӯнэ дил,

Даδ ту гапенен мудӯм, Померэ фикренард йамин.

 01. 05. 2016


Шич чисет йакбор фукаϑ нур, нурэ Йаздӯн йатху йат,

Нурэ Йаздӯн маштэ мемӯн ар Бадахӿӯн йатху йат.

Чудэ сар гапен ба Бисмилло хубаϑ комил йу ца,

Нур чисет машард хубаϑ, зиндайа Қурӯн йатху йат.

Шастуну соланд ичайаϑ маш ху Маwлойам наwинт,

Нур чисет Маwло хубаϑ ар мулкэ Хуғнӯн йатху йат.

Рузэ “Нур”андир Бадахӿӯн сут таwаллуд ас сараϑ,

Дундавен Маwлойэ Барақ ар wэ медӯн йатху йат.

Эй виродар йуӿк қатир Салwот wирд лӯвам фукаϑ,

Шойэ дидоранд ẃэ манэ ар Бадахӿӯн йатху йат.

Танху дилху чидху дарго, ас wэ нẙр руӿнойгэ сут,

Нẙр нур сиинандэ нẙрат маштэ мемӯн йатху йат.

Зойиранд лап δар йу ас маш, ат ба ботин маш қатир,

Зойират ботин кэ йакҷо нурэ аймӯн йатху йат.

Ар wэ дидор ас диланд ар там ца сут нур ис wэ киӿт,

Тар wэ хӯна ас wэ нур, баркат фароwӯн йатху йат.

Ай Муносиб йид ту ҷӯн мис ар ту тан мемӯн дэ фам,

Нур ту ҷӯнард йиwа сойиб, фам ту ҷӯнӯн йатху йат.

25.05.2012


Ту лиқойандта сухан ас мазабэ,

Ранҷэ муминта исоб хурд тарабэ.

Цанавид ганҷэ мазаб ар ту wуҷуд,

Пас ту чиз тир сухан ай беадабэ.

Мазабандат ди нафамт дуррэ адан,

Ди сухан пас фукафьик бе сабабэ.

Узта шэр маззаэ шафтолэ тэ лӯм,

Чиз ту шаф шаф қатэ weрӯн асабэ.

На ту зойир на ту ботин малум,

Узум айрӯн тута чиз хурд лақабэ.

Ца wизӯнум ту фукафь мардум хез,

Фука лӯвд бе адабат сар шақабэ.

Мот ту дӯниш мазабард нист қойил,

Кандэ тоҷик ку wизент ас арабэ.

Ту ху мазаб ху wуҷудандэ wизен,

Чиз нихӯна ту wэ фолат қарабэ.

Вога турд лӯм! Зарэ холис ту хьикар,

Ай ту ғофил аҷаб афсус аҷабэ.

Ту гуйо нимача wизенчат xy мазаб,

Пас цаwахт чирд ту дэ увд пухьт насабэ.

Ту мэ асрандэ виругьҷат йи дьу гап,

Ат цаwахт пас ди исоб ас раҷабэ.

Э Муносиб ту ди бе Кабайинард,

Чиз сухан, ас Аҷамат ас Арабэ.

23.08.2016, Роғун


Ганҷинайэ нурӯнийэ Қурӯн, Рамазӯн йид,

Дилсофийэ ар қалбэ парешӯн, Рамазӯн йид.

Сината гулистӯн, дэ ẁахтандэ ху ис киӿт.

Ас ростийа гулбоғэ гулистӯн, Рамазӯн йид.

Хайрат баракат чирд ага даркор ца вид лӯм,

Хайрат баракат мойэ фароẁӯн, Рамазӯн йид.

Зикрат салаẁот пеӿэ ẁэ дарго кэ муноҷот,

Омин луйата дастэ гулафшӯн, Рамазӯн йид.

Тасẁирэ Худоẁанд кэ ху синат ẁуҷуданд,

Нур ар дэ ту сина, фурузӯн, Рамазӯн йид.

Ар Ẁахт ту ца пеӿцен, Муносиб Рамазӯн чиз?,

Пэғӯмэ Хуδой бар мэ Мусулмӯн, Рамазӯн йид.

 07. 06. 2016, Душанбе


Арчай ца тизд ас мам ҷаӯн, афсус сад афсус ас аҷал,

Кудак ҷаwӯно нотаwӯн, афсус сад афсус ас аҷал.

Тойден азоро палаwӯн, цӯндога Искандармуқӯм,

Цӯндога подхьо ногаӯн, афсус сад афсус ас аҷал.

Кай Йусуфат кай пираан, Йақуб бемор ар Wатан,

Цӯндо сағир дьар ас wатан, афсус сад афсус ас аҷал.

Динйо амехьа сар пиро, вад Мустафойард беwафо,

Цӯндога кихьт фук ҷо хато, афсус сад афсус ас аҷал.

Цӯндойэ дьод ас даст Набӣ, цӯнд ҷат пидьид тоқа Алӣ,

Цӯндогайарден сат wасӣ, афсус сад афсус ас аҷал.

Дарйойэ дил туғйун ца дьид, хир wамтэ хахь ҷаwлӯн ца дьид,

Фармунта бад Йаздӯн ца дьид, афсус сад афсус ас аҷал.

Эй дил ху нолахь камдэ кэ, дусафь шэ ғам кал хамдэ кэ,

Панд ас Муносиб ҷамдэ кэ, афсус сад афсус ас аҷал.

21.09.2016


Фука зивтӣр пирод, нӯмэ Алӣ,

Фукайảм мас нур, ас ҷӯмэ Алӣ.

Ног амеӿả фука дилтӣр ниӿӯн,

Вид сароғоз, саранҷӯмэ Алӣ.

Ас ӿикидоẁэ ху дил, дӯнайэ бахт,

Фукайảм δэц нур, ар дӯмэ Алӣ.

Фука динйо ӿикирт, мастэ хумор,

Мảш фақат маст, ас зуғӯмэ Алӣ.

Хокэ тирảйатả. Фалак йакҷо,

Фука шайдойэ гул-андӯмэ Алӣ.

“Мустақӣмат — сирот”, ройэ Набӣ,

Муӿкилосӯнэ дам, ас кӯмэ Алӣ.

Ӯ Муносиб! Ху йошэ дил пảрен,

Кэ аẁойандэ ту бар бӯмэ Алӣ.

04.10.2016, Душанбе